БУРАДЗАГЪД

Нæртон мыггаг Борæтæй. Чысылæй йæ йæ мад сæ кæрты фæуагъта, æмæ йæ Нарты знаг сау Доллау адавта. Бæргæ ма йæ агуырдтой æппæт Нартæй, фæлæ ничи зыдта, Доллау кæм царди, уый. Бурадзагъды мад æмæ фыд сæ иунæг хъæбулы мæтæй мæрдтæм бацыдысты.

Сау Доллауæн цот нæ уыд æмæ Бурадзагъды йæхицæн фыртæн бахъомыл кодта. Доллау хъæздыг уыд æмæ буцæй дардта йæ фырты. «Нæ» йын ницæмæй дзырдта. Æрмæст, иуахæмы цуаны куы цыд, уæд ын афтæ: «Сырдтæ нæ хъæдты бирæ ис, кæмфæнды дæр сæ ссардзынæ, фæлæ Уарппы хохы 'рдæм ма цу». Бурадзагъд нæ байхъуыста Доллаумæ æмæ Уарппы хохыл Нарты Батрадзимæ иу урс саджы дыууæрдыгæй æмæхст фæкæнынц. Саджы мæлæтдзаг цæфтæ фæкæнынц сæ дыууæ дæр. Мард саджы уæлхъус сæ уæздандзинадæй кæрæдзийы зæрдæмæ фæцæуынц æмæ кæрæдзийæ æфсымæртæ загътой. Бурадзагъд ахоны Батрадзы сæхимæ уазæгуаты. Сау Доллау æй куы базоны, Батрадз Нартæй у, уæд фæдфæливæнтæ кæны, Бурадзагъды Нарты хъæумæ Батрадзимæ нæ уадзы.

Батрадз Сатанайæн Бурадзагъды тыххæй куы радзырдта, уæд уый уайтагъд базыдта, Борæты сæфт лæппуйыл кæй фембæлд. Сырдонимæ йæм ацыдысты æмæ Бурадзагъдæн раргом кодтой йæ сæфты хабар. Батрадз æмæ Бурадзагъд сау Доллауы къухтыл фæхæцыдысты, йæ гуырæй йын сæ атыдтой, стæй йæ Сау денджызы баппæрстой.

Сырдон, Батрадз æмæ Бурадзагъд Доллауы исбонимæ æрыздæхтысты Нартæм.

кæс «АРВЫ ДУАР»-Ы СÆРГÆНДТÆ